Vitskap og verkelegheit

Både filosofi og vitskap prøver å svara på spørsmål om verda og vår plass i den. Dette emnet har eit todelt mål. Det første målet er å utforske denne typen spørsmål frå eit filosofisk perspektiv. Emnet vil difor formidle og utvikle forståing for sentrale tema i metafysikk. Metafysiske spørsmål er filosofiske spørsmål om korleis verda eigentleg er og korleis vi menneske passar inn i den. Eksisterer fortida og framtida? Kan vi ha fri vilje sjølv om framtida er bestemt av fortida og naturlover?

Det andre målet er å utforske spørsmål om korleis vitskapen fungerer frå eit filosofisk perspektiv og å forstå kva vitskapen kan fortelje oss om korleis verda er. Emnet vil difor også formidle og utvikle forståing for sentrale tema i vitskapsfilosofi. Kva kjenneteiknar vitskap og kva skil vitskap frå andre måtar å utforske verda på? Kva vil det seie å gi ei vitskapleg forklaring av eit fenomen?

Kunnskap

Etter fullført emne skal studenten ha:

• oversikt over nokre sentrale filosofiske tema og debattar innan vitskapsfilosofi og metafysikk;
• kjennskap til viktige filosofiske bidrag til desse tema og debattane;
• ei forståing for omgrep, argument og teoriar som er relevante for desse tema og debattane.

Ferdigheiter

Etter fullført emne skal studenten kunne:

• beskrive og forklare sentrale omgrep, argument og teoriar frå dei filosofiske debattane innan metafysikk og vitskapsfilosofi;
• rekonstruere og evaluere argument og teoriar frå dei filosofiske debattane innan metafysikk og vitskapsfilosofi og identifisere deira styrkar og svakheiter;
• reflektere over og diskutere tema og debattar i metafysikk og vitskapsfilosofi;
• kommunisere idear knytt til emnets innhald, både munnleg og skriftleg.

Kompetanse

Etter fullført emne skal studenten ha kompetanse til å:

• delta i faglege debattar innan metafysikk og vitskapsfilosofi;
• ta vidare utdanning innan metafysikk og vitskapsfilosofi.