Natur og menneske i tyskspråkleg litteratur, online

Dette emnet gir ei innføring i korleis natur og menneske blir framstilt og forstått i tyskspråkleg litteratur og kultur, arbeider med ulike naturomgrep og naturforståingar, og diskuterer historiske, filosofiske og samfunnsmessige utviklingstrekk. Emnet kombinerer litteraturvitskaplege perspektiv med kulturhistoriske og idehistoriske innfallsvinklar.

Naturforteljingar blir undersøkte i ei rekke sjangrar og medium, mellom anna romanar, dikt, noveller, essay, film og sakprosa. Dette gir innsikt i korleis naturen blir representert, verdsett og diskutert på tvers av epokar og uttrykksformer - t.d. romantikkens natursublime eller samtidas økokritiske, klimamessige og biodiversitetsrelaterte diskursar.

Seminarundervisninga legg vekt på munnleg aktivitet, tekstnær diskusjon og refleksjon kring både personlege leseerfaringar og analytiske tilnærmingar.

Emnet gir grunnleggande innføring i vitskapleg arbeid, med særleg vekt på kjeldekritikk og siterings- og referanseteknikk.

Eit sentralt mål er at studentane skal kunne setje tyskspråklege naturforståingar i ein europeisk og global samanheng, og relatere dei til aktuelle debattar om klimakrise, naturmangfald, berekraft og miljøpolitikk.

Studenten skal ved avslutta emne ha følgjande læringsutbytte:

Kunnskap:

Studenten

• har kunnskap om historiske utviklingstrekk i naturforståinga frå opplysningstida til i dag

• kjenner til korleis natur og menneske blir framstilte i ulike tyskspråklege sjangrar og medium

• forstår sentrale idear, verdiar og filosofiske posisjonar som har forma naturforståingar i tyskspråkleg kultur

• kjenner til idehistoriske og samfunnsmessige kontekstar som påverkar naturrepresentasjonar

• har innsikt i dei utvalde pensumtekstane og den litteraturhistoriske konteksten dei står i

• har grunnleggjande kunnskap om sentrale litteraturvitskaplege/analytiske omgrep

Ferdigheiter:

Studenten

• kan lese, analysere og tolke litterære og kulturelle naturframstillingar ved hjelp av relevante analytiske omgrep
• kan diskutere naturverdiar og naturforståingar på presist og variert tysk

• kan samanlikne naturforteljingar i ulike sjangrar og medium

• kan setje tyskspråklege naturrepresentasjonar i dialog med europeiske og globale diskursar

• kan skrive faglege tekstar på tysk med klar struktur, korrekt bruk av kjelder og gjennomtenkt argumentasjon

• kan vurdere truverd og relevans i både primær- og sekundærlitteratur

• kan presentere fagleg innhald munnleg og delta aktivt i seminararbeid

Generell kompetanse:

Studenten

• kan reflektere kritisk over korleis natur og menneske blir forstått og framstilt i ulike kulturelle og historiske kontekstar

• kan bidra til faglege diskusjonar om natur, miljø, klima og biodiversitet i eit breitt humanistisk perspektiv

• kan forstå og vurdere naturdiskursar i ei tid prega av globale miljøutfordringar og politiske debattar

Online. 

Dette emnet finst òg som ordinært emne (TYS220) med eige opptak.