Fagdidaktikk i fransk, spansk og tysk 1 (fag 2)

Fagdidaktikk i framandspråk for fransk/spansk/tysk inngår som ein del av universitetet si lektorutdanning i framandspråk. Sentralt i studiet er spørsmål knytt til elevane si kompetanseutvikling i framandspråk og til utvikling av fagdidaktisk refleksjon og handling.

Eit grunnleggjande spørsmål er korleis studenten kan utvikle og relatere framandspråkfagleg kunnskap til det å vere framandspråklærar. Spesielt viktig er det å utvikle forståing for korleis eigen fleirspråklege kompetanse, innsikt i undervisningsspråket og innsikt i eigne læringsprosessar kan vere bidrag i arbeidet med å leggje til rette for språklæringa til elevane.

Studiet er organisert slik at ein har noko undervisning på tvers av språkfaga for å understreke ein felles kunnskapsteoretisk samanheng og med tanke på felles danningsmålsetjingar for språkfaga i skolen. Noko undervisning førgår på framandspråket, for å vidareutvikle tryggleik i bruk av dette i undervisninga og for å ta i bruk språkspesifikke fagomgrep.

Emnet er også knytt til praksis i skolen. Undervisninga i emnet vil gjennomgåande støtte studentane i å reflektere over praksiserfaringar i lys av fagdidaktikk.

Studenten skal ved avslutta emne ha følgjande læringsutbytte definert i kunnskapar, ferdigheiter og generell kompetanse:

Kunnskapar:

• har innsikt i sentrale styringsdokument for skolefaget
• har innsikt i fransk/spansk/tysk som dannings- og ferdigheitsfag
• har kjennskap til sentrale teoriar om språklæring og fleirspråklegheit
• har kunnskap om vilkår for læring og kompetanseutvikling i fransk/spansk/tysk

Ferdigheiter:

Studenten

• Kan analysere styringsdokument for skolefaget
• kan planleggje og reflektere over framandspråksopplæring basert på forskings- og erfaringsbasert kunnskap
• kan vurdere, bruke og utvikle læremiddel og arbeidsformer i faget i tråd med læreplanen for faget
• kan grunngi val og vurderingar ut frå eige fagsyn og praksisteori
• kan rettleie elevane i deira læringsprosessar på grunnlag av teoriar om språk, tekst, kultur og framandspråksutvikling
• kan vurdere elevane sitt læringsutbyte og legge til rette for elevar si vurdering av eiga læring
• kan ha ei kritisk tilnærming til analoge og digitale læringsressursar, og nytte dei i undervisning, planlegging og kommunikasjon, og som del av eiga utvikling
• kan uttrykkje seg munnleg og skriftleg på framandspråk innan fagfeltet

Generell kompetanse:

Studenten

• kan reflektere over eigen og andre sin skolepraksis i lys av kunnskap innanfor dei framandspråkfaglege disiplinane (språk, litteratur, kultur og fagdidaktikk)
• har utvikla innsikt i framandspråkfaget sitt kultur- og danningspotensiale og kan gjere greie for faget si utforming og samfunnsmessige grunngjeving
• kan reflektere over og vurdere eigen praksis for å kunne fornye og utvikle den fagdidaktiske kompetansen i framandspråk.
• kan undersøkje og drøfte framandspråklæring i lys av kunnskap innanfor dei framandspråkfaglege disiplinane (språk, litteratur, kultur og fagdidaktikk) og presentere refleksjon over dette skriftleg og munnleg
• kan opptre profesjonelt i møte med elevar, lærarar og andre aktørar i skulesamfunnet
• kan halde oppe relevansen av framandspråka sine historiske og akademiske tradisjonar og reflekterer kritisk kring desse
• Har innsikt i ulike analoge og digitale ressursar som kan fremje språklæring.